Olympics-ah Zika virus darh a hlauhthawnawm loh

World Health Organization (WHO) emegency committee chuan Brazil rama hri leng mek, Zika virus chu Olympic Games an thlen hunah khawvela a darh phah a hlauhthawnawm lutuk lo niin a sawi. Hei vang hian Olympics neihna tur hmun sawn emaw, a hun sawn hlat emaw a ṭul kher lo niin a tarlang.

WHO chuan Zika hri leng vang hian khawvel pumah public health emergency a lo puang tawh a ni.

Olympic Games neih turah khawvel ram hrang hrang aṭanga Brazil pantu an ṭhahnem dawn avangin Zika virus hi a darh phah hluai hlauhthawnna a lian hle. Zika virus hi thosi chi khat, Aedes seh aṭanga kai theih a ni a, WHO chuan Games neih hun tur, August thla hi Brazil rama thosi tlem lai a ni tih sawiin, hri leng chu a darh vak a hlauhthawnawm lutuk lo niin a sawi. Hemi rual hian zin turte chu fimkhur turin a chah nawn leh bawk. A bikin naupai laite chu Games neihna hmuna zin lo turin a ngen bawk.

Brazil official-te chuan Olympics lai hian ramdang khualzin mi 380,000 vel an neih an rin thu an sawi.