Obama leh Dalai Lama inkawm

US President Barack Obama leh Tibetan spiritual leader, Dalai Lama-te chu Nilaini khan White House-ah an inkawm a, hei hian China a ti lungawi lo hle. China chuan Dalai Lama hi China aṭanga Tibet lakhran duhtute fuihtuah a puh a ni.

Obama leh Dalai Lama-te hi ṭum li an inkawmna a ni a, White House-ah Map room-ah meeting hi an nei a ni. Ram dang hruaitute kawmna atana an hman ṭhin, Oval Office-ah chuan Obama bakah US President hmasate khan Dalai Lama hi meeting an neihpui ngai lo.

White House official chuan hruaitu pahnihte hian thu pawimawh hrang hrang an sawidun zingah human rights chungchang pawh a tel niin a sawi. Mahse an inkawmna kimchang erawh puanzar a ni lo. Dalai Lama hian Orlando nighclub-a inkahna thlenga thi te a tuarpui thu pawh a sawilang a ni.

China foreign ministry thupuangtu, Lu Kang chuan Dalai Lama'n China lak aṭanga Tibet independent chungchang a sawi thlawpna lam thu reng reng chu an duh lo tih a sawi. "US sorkar chuan thutlukna nghet tak a lo siam tawh a, China pakhat chauh a awm a, Tibet chu China ram peng pakhat, lakhran theih loh tih a lo pawm tawh a ni" a ti.

Kang chuan Dalai Lama chu sakhaw hruaitu chauh a ni lo a, China aṭanga inlakhranna tura hmalaknaah pawh a inrawlh nasa hle niin a sawi.