Colombia-ah naupai lai 12,000 dawnin Zika vei

U.S. Centers for Disease Control and Prevention (CDC)-a Colombian researcher leh scientist-ten report an tihchhuah≠ah, kumin April thla thleng khan Colombia ramah Zika virus kai mi 65,726 an awm a, an zingah hian hmeichhia an tam zawk.

Report hi Nilaini khan The New England Journal of Medicine-ah tihchhuah a ni a, Zika virus vei finfiah zingah hian nu, naupai 11,944 an tel. Mahse nau piang thar zingah Zika virus-in a thlen, pianphung pangngai aia lu te, microcephaly leh harsatna dang nei erawh hmuh an la ni lo.

Scientist-te chuan an thil zirchianna aṭangin naupai laia Zika virus veite hian microcephaly naute an hring vek kher lo a, ṭhenkhat chuan nu hrisel pangngai an hring thei niin an sawi. Naupai laia Zika hri an kai hun azirin an nau paiah nghawng a nei a, an nau pai a hram tawh hnuah veite chuan naute-ah hian nghawng a nei vak lo niin an sawi.

Kumina Colombia rama microcephaly naute enfiah zingah, pali chu Zika virus-in a thlen tih finfiah an ni tawh. Heng naute hi an nute hian Zika virus vei nia inhriatna an neih loh bakah, enfiah pawh an ni lo. Zika virus kai zingah hian he natna hi a langchhuak vek lo a, hei vang hian US health official-te chuan Zika hri lenna rama zin, a bikin naupai laite chu hri an kai leh kai loh enfiah vek turin an ngen a ni.