Myanmar leh Australia-in MoU ziak

Myanmar Supreme Court leh Federal Court of Australia chuan judicial lama thawhdunna tur, memorandum of understanding chu nimin khan Myanmar khawpui, Nay Pyi Taw-ah an ziak.

Inremna thuthlung hi Myanmar Chief Justice U Tun Tun oo leh Australia Chief Justice James Leslie Bain Allsp-ten anziak a, Myanmar ramchhunga court hrang hrang hnathawh tihchangtlunna turin Judiciary Strategic Plan chu ṭha taka kalpui an remti bawk.

Federal Court of Australia hian kum 1977 aṭang khan khawvel hmun hrang hranga judicial organization inlaichinna ṭha tak a siampui a, international court 50 chuang a thawhpui mek a ni.

Nimin vek khan Myanmar President U Htin Kyaw chuan an ram budget chu an ram economy siamṭhatna atan leh, mipui khawsak phung chawikanna atan ṭangkai taka hman a nih tur thu a sawi. Nay Pyi Taw-a Financial Commission meeting hmasa berah thu sawiin, commission chairman ni bawk U Htin Kyaw chuan 2016-17 budget siamṭhat chu parliament pawmpui tura thawn a ni dawn tih a sawi.

U Htin Kyaw chuan education, health and social welfare tana sum dah chu tihpun a nih thu a sawi a, thingtlang bial tihhmasawnna hna te, electric eng pek chhuah te, retheihna umbo leh infrastructure lam hmasawnna chu an ngai pawimawh dawn tih a sawi bawk.