Vietnam tuipuia bungraw phur Lawng pilah Captain a thi

Vietnam chhimlam tuipuiah Norway bungraw phur lawng a pil a, hetah hian lawng hnathawk pahnih, captain leh deputy captain te chu an thi tih finfiah a ni tawh. Thi te hi captain Ronel Acueza Andrin leh deputy captain Jerome Maquilang Dincy an ni.

Bungraw phur lawng, Bulk Jupiter hi Malaysia aṭangin China panin Zirtawpni khan an chhuak a, lawngah hian hnathawk 19, phillipines mi hlir an chuang a ni. Chhanchhuahna hna thawktu Vietnamese te hian he tuipuia sumdawng lawng kalvelte ṭanpuinain ruang zawn hna hi an thawk mek zel tih thuneitute leh Philippine Department of Foreign Affairs chuan a tarlang.

Lawnga eirawngbawltu hotu Angelito Capindo Rojas chauh a damchhuak nia hriat a ni. Rojas chuan thuneitute hnenah engtia lawng hi pil nge anih tih a hriatthiam loh thu sawiin, lawng chu a kal dan pangngaia a kal laiin a che thut a, a pil ta mai niin a hriat thu a sawi. Inhumhimna jacket a ha hman hram a,tichuan tuipuiah zuangthla in a him tih a sawi bawk.

Chhanchhuahna hna thawh hi khawchhia vangin a thawhchak theih loh thu Vietnam's maritime search and rescue operations coordination center-a general director Nguyen Anh Vu chuan a sawi.

Lawng neitu Bergen-based Gearbulk chuan Vietnam khawmual aṭanga km 287 a hla a kal laiin lawng aṭanga manganna thuthawn an thawnchhuah chu Japanese coast guard ten an dawng tih a sawi. An lawng hian bauxite a phur tih a sawi bawk.

Philippine Foreign Affairs sawi danin meter 190 a sei, ton 56,000 a rit chu Vung Tau vaukam, Vietnam khawpui Ho Chi Minh City aṭanga km 96 a hla tuipuiah a pil tih an sawi. Liberia, Oman, Singapore leh China aṭanga lawng teivak te chuan ṭanpuina an thawk ve a ni.