Indonesia lawng sipaiten thlawhna mei ni ngeia hriat an hmu

Indonesian sipai lawngte chuan nimin khan an mamawh ber, AirAsia thlawhna meia awm black box, chanchin an hriat duh zawng zawng awmna chu hmu tawh ngeiin an captain chuan a sawi. Indonesia khawpui lian ber dawttu Surabaya aṭanga Singapore pana thlawk Flight QZ8501 Java tuipuia tla ta zawn hna chu lawng leh thlawhna hmanga ni 8 chhung ngawrh taka kalpui a nih hnu ah a hmunhma zau zawk tuamchhuah tumin theihtawp chhuah mek zel a ni.

Captain Yayan Sofyan chuan an mamawh tak thlawhna mei chu zawng hmu tawhin inhre mahse, Indonesia search and rescue agency ten an thil hmuhchhuah nemngheh phawt an la hmabak a ni.

Indonesia meteoro­logical agency te sawi­dan­in khawchhe lutuk chuan khualzinte ruang leh thawhna mei zawnhmuh kawngah harsatna an tawk nasa hle. Kar kalta aṭang khan Borneo island aṭanga boruak mel 90 a hla a thlawhna bung hrang ṭhenkhat, metre 18 bawr vela lian panga lai an lo hmuhchhuah chu an endik mek hlawm a ni.

Peter Marosszeky, University of New South Wales, Sydney pawhin black box zawnhmuh har nachhan chu khawchhiat em vang chauh a ni tih a sawi. "Tuipui boruak leh khawchhe karah chuan mihring te tan chet a khirh duh hle. Vanneihthlak tak chu black box hi ni 30 chhung a nung dawn a, chumi hma chuan harsa loin zawnhmuh ngei a ni ang," a ti.