British MP Jo Cox kaphlum

British MP, Jo Cox-i (41) chu Ningani khan West Yorkshire-a Leeds khawdai, Birstall khuaah kahhlum a ni a, a kaphlumtu kum 52 mi Tommy Mair chu man nghal a ni.

Tommy Mair hian Cox-i hi silaia vawi thum a kah hnuah chemtein vawi eng emaw zat a vit zui bawk. Kum 77 mi pakhat a khawih tel bawk a, a ni hian hliam na vak lo a tuar.

MP Cox-i hi Bately and Spen bial aṭanga Labour Party MP a ni a, MP a nih ṭum khatna a ni. European Union-a Britain a awm chhunzawm zel thlawptu a ni.

Pawikhawihna thleng mita hmutute chuan Tommy Mair hian Cox-i hi silaia kapa chema a vih hnuah pawh, leia a tlu chu a la pet chhunzawm niin an sawi. Cox-i a beih lai hian far-right political group hming, 'Britain First' tiin a au nia sawi a ni bawk. Mahse he pawl hian pawikhawihna thlengah hian inhnamhnawihna an neih loh thu an sawi.

Jo Cox-i hi air ambulance hmangin Leeds-ah hruai nghal a ni a, mahse a hliam a nat em avangin a tuar chhuak zo ta lo a ni.

Prime Minister David Cameron leh Opposition Leader Jeremy Corbyn-te chuan Cox-i uina thu an sawi nghal a, PM Cameron hian EU campaign meeting, Gibraltar-a neih tur pawh a cancel nghal a ni. Cameron chua, "Jo Cox hi a hnaah inpe zo leh midangte ngaihsaktu a ni. A pasal Brendan leh a fate pahnih ka tawrhpui takzet a ni" a ti.

Corbyn pawhin Labour party leh an ram pum chu Jo Cox-i rawng taka thah a nih dan chuan a ṭhawng takzet tih a sawi a, MP Cox-i chu mipuite rawngbawlna lama hnuhma nei ṭha tak a nih thu leh, politics a zawm hma pawhin charity Oxfam leh Freedom Fund tana a thawh ṭhin thu a sawi.

Tualthattu Tommy Mair hi US-a neo-Nazi group thlawptu nghet tak niin civil rights group, Southern Poverty Law Centre chuan a tarlang. Mi ngo dah chungnunna thlawptu niin, helama hmalaknaah pawh a tel fo tawh nia sawi a ni bawk. Mingo hlang awmna ram siam a, Juda mi nuaibo duhtu pawl, National Alliance ho chanchinbu siam leina atan pawh pound 620 chuang a seng tawh niin a sawi bawk.

Hetihlai hian Main-a unaupang, Scott Mair chuan a unaupa chu tharum thawh ngai lo a nih bakah, politics lam pawh a ngaihven lem lo niin a sawi. Rilru lamah harsatna nei tawh a ni a, mahse hei chu ṭha taka enkawl a ni tawh a ni, a ti.