Sanders-an Trump hneh thei turin Hillary puih a tum

US Senator Bernie Sanders chuan November thla US President thlanna neih turah, Republican candidate tur Donald Trump chuan hneh a nih ngei theih nan Democratic Party nominee beisei, Hillary Clinton chu puih a intiam.

US President thlanna neih turah hian Republican lam candidate tur chu a chiang tawh a, Democrats lamah pawh party candidate tur Hillary Clinton-i chu tling tawh angah ngaih ni mah se, result hi a la chiang lo a ni. Democrats president candidate chuhnaah hian Bernie Sanders hian Clinton-i hi a la um zel a, a umphak beiseina awm tawh lo mah se inhnuhdawh mai tum bik lo tih a sawi.

Sanders chuan amah thlawptute hnena thuchah a sawiah Hillary Clinton-i hi a thlawp thu a sawilang lo a, mahse President thlan hunah Hillary Clinton-i chu puih a inhuam thu a sawi. Democrats lamin president candidate inchuhna aṭanga inhnukdawh tawh mai turin nawr mah se, Vermont Senator hi a la campaign chhunzawm reng a ni. A thil tum, sum lakluh inthlauhna sang lutuk tihzia awm te, politics-a sum ngah avanga thiltitheih tak awm ṭhin tihbo tumina bei zel dawn tih a sawi a ni.