Democrats-in silai khuahkhirh duh

Orlando, Florida-a nightclub-a inkahna rapthlak tak a thlen hnuah, US Democratic Party chuan an rama silai khuahkhirhna dan siam turin Senate an nawr.

Silai khuahkhirhna dan siam chungchang hi Republican thunun, Senate-ah darkar 15 chhung sawiho a ni a, Republican lamin vote lak an remtih hnuah debate hi an tawp thei chauh a ni.

Democratic Senator Chris Murphy chuan Senate-ah hian 'no-fly no-buy' dan chu pawmpui turin member te a nawr. He ruahmanna hnuaiah hian thuneituten an enthlak mek leh, thlawhtheihna hmanga zin an khap mek list-a chuang chu silai an lei phalsak an ni dawn lo a, Orlando nightclub beitu Omar Mateen pawh kha he list-ah hian telh a ni.

Murpht hi senator 40-ten an thlawp a, an zingah han Republican member Pat Toomey pawh a tel. Hun rei tak chhung silai vanga pawikhawihna thleng ṭhin tihziaawm a nih theih dante an sawiho a, Republican lamin vote lam an remti thei ta a ni.

US President Barack Obama leh Vice President Joe Biden-te chu nimin khan Orlando tlawh tur hian an kal a, President Obama chuan Orlando a tlawh lai hian silai khuahkhirhna dan khauh zawk siam ngei turin Senate hi a ngen. Obama kaihhruai sorkar hian kum 2012-a Newton, Connecticut-a school-a inpawngkahna thlenga mi 26 an thih hnu khan silai khuahkhirhna dan khauh zawk siam tumin a bei reng a, mahse a la hlawhtling thei lo. Obama chuan Orlando leh hmun danga inpawngkahna thlenga pawikhawihtute thil tih chhan chu a in ang kher lo a, mahse an hmanruate chu thuhmun a ni tiin, senator-te chuan chhiatna dang thlen leh thei turte dang tura thutlukna dik tak an siam ngei a beisei thu a sawi. Dan khauh zawk an siam loh chuan, pawikhawihna rapthlak tak hi a la thlen belh zel a hlauhawm hle a ni, a ti.

June 12, Pathianni zinga Orlando gay nightclub-a inkahna thleng kha kuminah ni 168 chhunga US-a inpawngkahna, mass shooting a thlen ṭum 176-na a nih thu Mass Shooting Tracker chuan a tarlang. Tracker hian mi pali emaw, a aia tam emaw kahhlum an nih kher loh pawha kahfuh an nihna chin chu mass shooting-ah chhiar a ni. Orlando nighclub-a inkahna a thlen hnu khan mass shooting hi ṭum ruk a thleng leh tawh niin a sawi bawk.