California leh New Mexico-ah ram kang

US-a California leh New Mexico-ah ram nasa takin a kang a, mi tam tak hmun him lamah an insaseng tawh.

California chhim lama ram kang vang hian in 400 vel chu an dinhmun a hlauhthawnawm niin Santa Barbara Sheriff Bill Brown chuan a sawi a, he ram kang hi Nilaini aṭanga chhuak niin, Los Padres National Forest ram zau tak a kang tawh a ni.

Kangṭhelhtu mi 500 vel chuan helicopter hmangin ram kang hi ṭhelh an tum mek tih official-te chuan an sawi. Mahse ram kang hian ziaawm lam a la pan thei lo.

New Mexico-ah pawh Nilaini aṭang vek khan ram kang nasa tak, Dog Head Fire an tih chu a thlen avangin state of emergency puan a ni. Governor Susana Martinez chuan state National Guard-te chu kangṭhelh hna thawhna kawnga a ṭul anga pui thei tura inpeih turin a hriattir.