Germany-a Islam duh lohna kawngzawhah tel an tam

Germany ram khawchhak lam, Dresden khawpuiah Islam sakhuain khawthlang ram laka nghawng a neih dante duh lohna lantirin kawng zawh huaihawt a ni a, tel an ṭhahnem hle.

Thawhṭannia kawngzawhte hi right-wing movement, "Patriotic Europeans Against the Islamisisation of the Occident" (PEGIDA) thlawptute an ni a, Chancellor Angela Merkel chuan kawngzawh hi huaihawt lo turin ngen mah se mi tam tak an pungkhawm a ni. Sawiseltute chuan inthliarna leh ramdangte enhran leh hlauhna awm ṭhin duh loh vanga kawngzawh an ni zawk niin an sawi.

PEGIDA nawrh huaihawt an thlawpna lantirin sumdawnna hmun, biak in, Cologne citypower company leh hmun pawimawh dang tam tak chuan an building leh hmun pawimawhte an ti thim vek bawk.

Thla thum kalta aṭang khan PEGIDA hian khawchhak lama Dresden khawpuiah hian lungawi lohna an lo lantir ṭan tawh a, he bialah hian hmundang aṭanga pemlut leh Muslim mi an tlem thei hle a, mahse Krismas hma lawk khan Muslim hi 17,500 vel­ah an pungchho hman tawh a ni.

PEGIDA chuan eng sakhua pawh ni se inhuatna lam hawi zawng­a inzirtirna chu an dodal tih an sawi a, Muslim chengte chu an haw lo a, mahse hmeichhiate hrekbehna leh an laka tharum thawhna kalpui dan chu an dodal tih an sawi. Neo-Nazi symbol leh slogan pawh an duh loh thu rally-ah hian an sawi bawk.