AirAsia flight QZ8501 zawnna bial zauh a ni
December 28-a tuipuia tla, AirAsia flight QZ8501 zawn hna chu thawh chhunzawm zel a ni a, Indonesia official-te chuan an zawnna huam chin an zauh tih an sawi.
Surabaya, Indonesia aṭanga Singapore pana thlawk, AirAsia thlawhtheihnaah hian mi 162 an chuang a, an zinga mi 37 ruang chu hmuh an ni tawh. Indonesia sipaite chuan chanchin an hriat duh zawng awmna tur, black box awmna thlawhtheihna mei awmna chu an hre tawh niin an sawi a, mahse khaw chin ṭha lo avangin a awmna tak hi an la pawh thei lo a, khawmualah an la lachhuak thei lo a ni. Thlawhtheihna tlak chhan dik tak hi hriat theih a la ni lo.
Indonesia search and recue agency hotu, Henru Bambang Soelistyo chuan nimina Jakarta-a chanchin thar lakhawmtute a kawmnaah, ngawrh takin thlawhtheihna tla them te chu zawn zel a ni tih a sawi a, khaw awmdan pawhin ṭhat lam a pan zel a, tuihnuaiah a zawnna hmanruate pawh dah niin, tuilut thiamte'n an hna an thawk chhunzawm leh thei dawn niin a sawi.
Lawnglian leh aircraft eng emaw zat chuan thlawhtheihna tla zawn hna an thawk a, nimin khan China chhanchhuahna lawnglian leh US Navy lawngliante pawhin an zawm ve leh bawk.
AirAsia thlawhtheihna tlaah hian puitling 137 leh nuapang 17 bakah nausen pakhat, pilot pahnih leh thawktu panga an chuang a, an zinga a tam zawk hi Indonesia mi an ni.
Tuipui aṭanga ruang hmuhte hi tute nge an ni tih finfiah turin national leh international doctor 260 velin an kutzia, dental record leh DNA te an zirchiang mek niin Armed Forces commander Gen Moeldoko chuan a sawi.