Pakistan-in firfiak 615 lu manah Rs mtd 760 a phal
Pakistan-a Khyber-Pakhtunkhaw province chuan nimin khan firfiak 615 lu manah cheng maktaduai 760 lawmman pek a phal thu a puang a, heng zingah hian Tabiban hotu Mullah Fazlullah man a nih theih nana a chanchin hrilh thei hnenah lawmman cheng maktaduai 10 pek a phalna pawh a tel.
Firfiak man tura an duhte hming leh lawmman hi provincial Information Minister Mushtaq Ghani-a'n a puang. Taliban hotu Fazlullah bakah Laskhar-e-Islam pawl hotu Mangal Bagh lu manah cheng maktaduai 10 a phal bawk.
Pakistan sorkar hian an rama firfiakte laka beihpui thlak hna chak zawka kalpui tumin a bei mek a, a bikin hmarthlang lama tribal bialah beihpui a thlak nasa hle. Firfiaka chetna beih let dan tur ngaihtuah tur hian National Action Plan pawh din a ni tawh bawk.
Nimin khan Pakistan sorkar chuan kum 2008, November 26-a Mumbai khawpui beihnaa a ruahmantu bera puh, Zaki-ur-Rheman Lakhvi-a bail-a chhuah phalsak a nih chungchang ngaihtuah ṭha tura a ngenna chu Islamabad High Court-ah ngaihtuah a ni. December 18, 2014 khan anti-terrorism court chuan Lakhvi-a bail dilna hi a lo remtih sak a, mahse bail-a chhuah phalsak a nih tukah hian Maintenance of Public Order hnuaiah man leh nghal a ni. Lakhvi hi Afghan mi, Muhammad Anwar Khan ruboa puh a nih avangin man a ni a, 26/11-a Pakistan firfiakte'n Mumbai khawpui an beih ṭum khan a ruahmantu ber nia puh a ni bawk. Mumbai khawpui beihnaah hian mi 166 an thi a ni. He pawikhawihna kaihhnawihah hian kum 2008, December thla khan Lakhvi hi man a ni a, November 25, 2009 khan midang paruk nen thubuai siamsak niin, an thubuai hi ngaihtuah mek a la ni.