US-in Palestinian hnena chhiah pek tihtawpsak sawisel
Palestinian-in International Criminal Court zawm tura a dilna Israel-in a duh loh avanga chhiah a pek tur a tihtan sak chu United States-in a sawisel.
US State Department thupuangtu, Jen Psaki chuan, "Boruak ṭha lo chawk chhuak thei zawnga thiltih reng reng chu kan duh lo a, he thil hian thil ṭha lo zawk a thlen thei dawn a ni," a ti.
Kar kalta Zirtawpnia Palestinian-in Hague-a International Criminal Court (ICC) zawm dilna a thehluh avang khan Israel chuan Palestinian hnena chhiah a pek tur, dollar maktaduai 127 vel chu a pechhuak duh ta rih lo a ni.
US Secretary of State John Kerry chuan hemi chungchang hi Israel Prime Minister Benjamin Netanyahu pawh a sawipui tawh a, US team-in Palestinian hruaitute an be tawh bawk. Psaki chuan, "Pawl hnihte inkarah boruak ṭha lo leh, an inbiakna chhunzawmna tur dal thei thil siam lo turin kan ngen a ni," a ti.
Kum 2012 November thlaa UN-in Palestinian hnena observer state rank a pek hnu khan Israel chuan chhiah a pek ṭhin a lo tihtan sak tawh a, hei bakah hian West Bank leh East Jerusalem-a Juda te chenna tur in 3,000 sakna tura ruahmanna pawh a puang nghal a ni.