Russia-in thla 4 chhunga Kyiv a beih nasat ber ṭum a thleng

Russia-in Thawhṭanni khan Ukraine ramchhunga khawpui panga chu missile 40 chuang hmangin a kap tih Ukraine President Volodymyr Zelenskyy chuan a sawi. Russia-in Ukraine a beih avang hian mi 20 aia tam an thi a, hliam 50 chuang an awm a ni.

Thawhṭannia Russia in Ukaine khawpui, Kyiv a beih chu thla li chhunga a beih nasat ber ṭum nia tarlan a ni. Kyiv khawpui chhunga district 10 chuang an kap fuh a, mi pasarih thi an awm bakah hliam 25 chuang an awm nia tarlan ani bawk. Ukraine President Volodymyr Zelenskyy pianna hmun, Kryvyi Rih-ah chuan Russia beihna vang hian mi 10 in nunna an chan a, hliam 37 chuang an awm nia tarlan a ni.

Volodymyr Zelenskyy chuan khawvel ram dangte chu ngawi tawh lo turin a duh a, Russia nihna leh a thil tih ṭhin a lang chiang zel tih a sawi. United States president Joe Biden pawhin Thawhṭannia missile hmanga inbeihna chu "Russia nunrawnzia hriat thar tirtu" a nih thu a sawi. Biden chuan tun hi Ukraine thlawp hun pawimawh a ni tih sawiin khawvel ram dangte chu Ukraine lam ṭangah a sawm a, Russia inlulinna chu ngaihthah chi a ni lo tih a sawi bawk. UN Secretary-General Antonio Guterres chuan Russia beihna chu mak a tih thu a sawi ve bawk.

Russia missile kah chhuah hian Ukraine-a naupang damdawi-in lian ber a fuh nia tarlan a ni. Oleksandra naupang damdawi-ina toxicology department inchhawng chu missile hian a kap fuh tih Ukraine thuneitute chuan an sawi a, damdawi-in hnathawk pahnih chuan nunna an chan a, mi 16 chuangin hliam an tuar niin an tarlang.

Russia defence ministry chuan Thawhṭannia missile kah chhuahte hian Ukraine defence plants leh military air base te an bitum niin an tarlang ve thung. Russia hian civil mite chenna hmun an bitum ngai lo tih sawiin, tuna mipui chenna hmuna chhiatna thleng tam zawk chu Ukraine air defence missile vang zawk niin an sawi. Ukraine hian Russia missile 30 chuang an kap thla tih an tarlang ve bawk.