AA-in Myanmar sipaite kut aṭangin airport lak sak

Myanmar-a sorkar sipai nena inbei mek, Arakan Army (AA) armed group chuan Yangoon hmarthlang lam, km 260 vela hlaa awm, Rakhines state-a Thandwe Airport, Ma Zin Airport tih bawk chu sipaite kut aṭangin an la tih an sawi.

Telegram messaging app-ah airport an lak thu hi Arakan Army hian an sawi a ni. He airport hi Myanmar khawthlang lam, Rakhine state chhim lama awm a ni. Armed group kuta airport a awm chuan, Rakhine bial pum an lak theihna kawng a hawnsak thei dawn nia ngaih a ni bawk. Tualchhung mite pawhin AA kuta airport a awm tawh thu hi an sawi a ni.

Arakan Army hi Rakhine state-a Buddhist Rakhine ethnic group-a an military wing an ni a, nikum November thla aṭang khan sorkar sipaite hi nasa zawka bei letin, township 17 zinga pakua an kutah a awm tawh. Nikum October thla aṭanga sipaite laka beihpui thlaktu, armed group intelkhawm zingah pawh an tel a ni.

AA leh sipaite hi Thandwe City ah hian kumin April 13 aṭang khan an inbei tawh a, June 27 khan AA hian 566th Light Infantry Battalion base chu lain, Thandwe khawpui bula camp eng emaw zat an la tel bawk. Airport veng tur hian sipai 400 vel dah ni mah se, AA hian July 5 zing dar 6 khan sipaite kut aṭangin an laksak niin an sawi. He airport bula sipai awmte pawh inhnukdawkin, battalion dang an zawm tih an tarlang.

Myanmar deputy leader-in China a tlawh

An ram chhungah sipai leh armed group-te inbeihna thleng mek karah, Myanmar sipai sorkara an hotu lu 2-na, deputy leader Gen Soe Win chu China-ah a zin. Thawhṭanni leh nimina Shangai Cooperation Organisation huaihawt, Green Development Forum-ah a tel.

Sipai hotu lu ber, Gen Min Aung Hlaing hian kum 2021, February thlaa civil sorkar thuneihna an hnehchhuh hnuah China ram hi a la tlawh leh lo a, Soe Win hi sipai sorkar, State Administration Council (SAC)-a China tlawhtu official pawimawh ber a la ni.