Macron-a'n France Prime Minister banna pawm lo

France president Emmanuel Macron chuan prime minister Gabriel Attal banna theh luh chu a pawm lo a, sorkar thar a din fel hma chu a hna hi chelh chhunzawm rih turin a ngen.

July 7-a an ram inthlan neihah khan sorkar siam thei tura chak zo an awm lo. Seat 577 awmna National Assembly-a majority nei tur hian seat 289 an neih phak a ngai a ni. Inthlanah hian New Popular Front (NPF) kaihhruai leftist leh environmentalist party ṭangrualte chuan seat la tam berin seat 188 an la a, President Macron kaihhruai centrist party ṭangrual pawl, Ensemble chuan seat 161 lain, far-right leader Marine Le Pen kaihhruai National Rally (NR) leh a thawhpuite chuan seat 142 an la a ni.

Ṭangrual pawl pathumten sorkarna an siam pha lo vek a, hei vang hian sorkar thar hi eng tikah nge a din theih dawn a la chiang thei lo a ni. Sorkar thar a la din mai theih dawn loh avang leh, tun thla tawp lama Paris Olympics ṭan a nih tawh dawn avangin PM Attal hi a hna chelh chhunzawm rih tur hian ngen a ni.