US-in PM Modi Russia rama zin a ngaimawh

India prime minister Narendra Modi chuan ni hnih chamin Russia a tlawh a, US State department chuan Ukraine run mektu Russia leh India inzawmna chu an ngaimawh tih an tarlang.

US State department thupuangtu Mathew Miller chuan India chu an ṭhian pawimawh tak a ni tih sawiin, an inkar inzawmna pawh a nghet ṭha niin a sawi, hemi avang hian India leh Russia inkara inzawmna chuan a tihlauthawng niin a sawi. Miller chuan tun hnai lawka India PM leh Ukraine president inkawmna chuan a tilawm hle tih a sawi a, India chu ram dangte an ngen ang bawkin Russia nena an inbiaknaah Ukraine indona tihtawp a nih dawn chuan UN charter zulzui leh, Ukraine zalenna humhim a, a ram chin humhim tura inremna kawng zawnpui turin India chu a ngen bawk.

Miller chuan PM Modi-a'n Putin nena an inkawmnaa an thil sawi, mipui hriata a sawi chhuah hun a ngaichang reng dawn tih sawiin India leh Russia inlaichinna chu an ngaimawh reng tih a sawi bawk. Russia-in Ukraine a rûn hnuah India hian Russia nena an inlaichinna chu tichhe loin a sumdawnpui zel a, hetih rual hian Ukraine-a remna leh muana a awm a duh thu erawh a au chhuahpui ṭhin thung.