April 1 atangin Palestine-in ICC a zawm dawn

United Nations (UN) Secretary General Ban Ki-moon chuan April 1 aṭang hian Palestine-in International Criminal Court (ICC) a zawm dawn tih a sawi. ICC a zawm chuan Palestinian hian Israel lakah war-crime charge pawh a siam thei tawh dawn a ni.

Kar kalta Zirtawpni khan Palestinian chuan ICC zawm dilna hi a thehlut a ni. Hei hi Israel chuan na taka sawiselin Israel Prime Minister Benjamin Netanyahu chuan an sipaite chu thubuai siamsak an remti dawn lo tih a sawi.

Palestinian hma lak dan a duh loh vang hian Israel chuan chhiah a pek tur pawh a pe duh rih lo a ni. Palestinian tana chhiah a laksak, dollar maktaduai 125 chu a tihtan sak bakah, hremna dang pawh siam a la tum bawk. Israel in thlatina chhiah a pek hi Palestinian chuan sorkar inrelbawlna atan leh sorkar hnathawktute hlawh atan a hmang ṭhin a ni.

Israel official pakhat chuan an kalphung an thlak a ngai dawn tih sawiin, defence mode aṭangin attack mode an hman a ngai tawh dawn a ni, a ti. US leh hmundangah te Palestinian hruaitu Mahmoud Abbas leh an official dangte lakah thubuai an thehlut thei tih a sawi bawk.