SKorea activist-te'n NKorea sawiselna leaflet an chhuah leh
South Korea activist-te chuan Thawhlehni zan khan North Korea nena an inri-na bulah North Korea sorkar sawiselna thuziakte an chhuah leh a, he thil thleng hian ram pahnihte inkara inremna kawng zawnga hmalakna a tihbahlah phah rin a ni.
Activist-te'n leaflet an tihchhuah hma hian NKorea ram hotu lu ber, Kim Jong-un chuan thuchhuah siamin, SKorea nena inbiakna nei tura an inhawn thute a lo sawi tawh a ni.
Campaign for Helping North Koreans hotu, Lee Min-Bok chuan Thawhlehni zanah hian leaftet 300,000 vel an chhuah niin a sawi.
Nikum October thla khan Lee hian NKorea sorkar sawiselna leh demna thu balloon hmangin an lo thehdarh tawh a, hei hian North lam thin a ti ur hle a, ram pahnihte inri-naah silai pawh hmehpuah a nih phah bawk a ni.
NKorea sorkar chuan leaflet tichhuaktute chu misual tia sawiin, an thiltih chu dan sak turin SKorea thuneitute pawh a lo phut tawh bawk.
South Korea unification ministry chuan NKorea demna thuziak thehdarh chungchangah a ṭul angin action a la dawn tih a sawi. Ministry thupuangtu Lim Byeong-cheol chuan police-te nen thawkdunin theihtawp an chhuah dawn tih a sawi a, hemi rual hian thuziak thehdarh chungchang chu miin an ngaihdante tilang turin zalenna an nei a, thuneitute'n an lo dansak ngawt thei lo niin a sawi.