Ebola vaccine thar enchhin a ni

Africa khawthlang lama hri leng mek, Ebola hri danna, vaccine siam thar chu Oxford University-ah scientist-te'n volunteer-te taksaah an enchhin ṭan.

Vaccine enchhinna atan hian volunteer 72 awmin, kum 18-50 inkar an ni. Hemi hma hian Janssen Pharmaceutical Companies of Johnson and Johnson siam vaccine chu zâwng-ah enchhin a lo ni tawh a, a hlawhtling nia sawi a ni.

Volunteer-te hian injection an lak hnu thla khat emaw thla hnih hnuah emaw dose dang an lak belh leh ang. Hetiang bawka enchhinna hi US leh Africa ram pathumah kalpui tum a ni bawk.

Nikum September thla khan US-a GlaxoSmithKline leh National Institutes of Health siam vaccine chu Oxford-a Jenner Institute team te'n an lo enchhin tawh bawk a, he enchhinna result hi reilote hnuah tihchhuah a ni ang a, tun thla tawp lam hian Ebola hri hluarna, Africa khawthlang rama health worker-te hnenah pek hman beisei a ni.

Biotech company NewLink Genetics siam, Ebola vaccine chu Merck in a lo leisak tawh a, Switzerland-ah enchhin a ni a, mahse thla hmasa khan volunteer-te'n an ruh chuktuah na an sawi avangin tihtawp lailawk a ni a, dose hniam zawka pein tun kar aṭangin enchhin chhunzawm leh a ni. Russia ramah pawh Ebola vaccine hi siam mek a ni bawk.