AirAsia Flight QZ8501 mei hmuh a ni ta

AirAsia thlawhtheihna tla, flight QZ8501 mei chu Indonesian search and rescue team-te'n tui hnuaiah an hmu ta niin agency hotu, Fransiskus Bambang Soelistyo chuan a sawi.

Nimina chanchinthar lakhawm­tute a kawmnaah, Soelistyo chuan, "Kan zawn ber thlawhtheihna mei chu kan hmu ta a ni," a ti. Thlawhtheihna meiah hian black box voice leh flight data recorder-te a awm a, heta ṭang hian thlawhtheihna chetsual dan chanchin kimchang pawh an hriat theih beisei a ni.

December 28-a Surabaya aṭanga Singapore pana thlawk, AirAsia thlawhtheihnaah hian mi 162 an chuang a, Java Sea-ah tlain a chuangte pawh an thi vek a ni.

Thlawhtheihnaa chuang zinga mi 40 ruang chu hmuh an ni tawh a, a tam zawkte erawh chu thlawhtheihna chhungah an la awm rin a ni. Thlawhtheihna chetsual chhan hi hriat a la ni lo a, mahse a chetsual lai hian khua a chhe hle a, a thlawhna kawng thlak pawh an dil hman a ni.

Thlawhtheihna tla hi a them

ṭhenkhat, seat leh a kawngkharte chu tuipuiah hmuh an ni tawh a, kar kalta kartawp lam khan official-te chuan thlawhtheihna tla them lian deuh panga nia hriat chu tuipuiah hian an hmu a, mahse tuifawn a nasat avangin a finfiah turin tuilut thiamte an kal thei lo a ni.