Rio state-in financial emergency a puang

Olympic Games thlengtu tur, Brazil-a Rio de Janeiro state chuan Olympics ṭan hun tur ni 50 pawhin a dang tawh lo tihah sum lamah harsatna an tawh avangin financial emergency a puang.

Interim Governor Francisco Dornelles chuan sum dinhmun a chhiat tak em avangin Games neih tur atana an inpuahchahnaah pawh an duh angin an kalpui thei lo tih a sawi. Olympics neihna atan inbuatsaihna senso tam zawk hi Rio City government-in a tum a, mahse state hian transport leh venhim lam hna thawktute a buaipui a ngai ve thung a ni.

Governor chuan sum lama harsatna an tawhna chhan pakhat chu chhiah a luh ṭhat tawk loh vang niin a sawi a, a bikin oil industry lam aṭangin a lut ṭha lo tih a sawi. State in sum lama harsatna a tawh avang hian sorkar hnathawk leh pensioner-te hlawh leh arrear pawh tam tak a batsak a, hospital leh police station thlengin harsatna an tawk a ni.

Rio state-in financial emergency a puan hnu hian Brazil sorkar chuan emergency fund aṭangin state tan hian dollar maktaduai 849 pek a tum. Heng sumte hi Olympic Games neih chhunga security kalpuina atan leh, infrastructure lam senso rulhna atan hman a ni bawk ang.

Olympic Games hi August 5 aṭangin ṭan a ni dawn a, Games neih chhung hian Rio hi ramdang mi 500,000 velin an tlawh rin a ni.