Sri Lanka President thar tur thlan a ni

Sri Lanka mipuite chuan nimin khan an ram president thar tur thlangin vote an thlak a, candidate 17 awmin an zingah hian President ṭanglai Mahin­da Rajapaksa leh Health Minister hlui Maithripala Sirisena-te an tel.

President thlannaah hian vote nei mi maktaduai 15 vel an awm a, zingkar aṭangin vote thlak tuma intlar an tam hle. Inthlan hi venhimna khauh tak hnuaiah neih a ni.

Sirisena hi nikum November thla khan Rajapaksa hnuaia minister a nihna aṭangin a bang a, hemi hnu hian Rajapaksa chuan president term thumna a chuh leh theihna turin an ram dan pawh a lo siamṭha tawh bawk. Sirisena chuan inthlanah hian a chak ngei dawn tih a sawi a, "Hmun tinah min thlawptu, ram hruaitu thlak duhtu an awm a, nak­tuk aṭangin kan ramah politics kalphung thar kan hmu tawh dawn a ni," a ti.

Inthlan dawna campaign-naah Sirisena hian president hnena thuneihna tam zawk pek a nih chung­chang a sawi nasa hle a, hei bakah hian Rajapasak chu eiruknaa inhnamhnawihah a puh bawk. Mahse President chuan a puhna hi a pha thung a ni.

Rajapaksa pawhin a term thumna atan President atan hian thlan tlin a ni leh dawn tih a sawi bawk. Kum 2010-a hneh taka thlan tlin a nih hnuah Rajapaksa hian President thlannaa a khingpui, sipai hotu hlui Sarath Fonseka chu jail-ah khungin, an ram danpuia president term hnih chin chuh theih tih chu a siam danglam a, an ram hruaitu pawimawh- judge, sorkar hotu lian, police official leh sipai hotu lute ruat theihna tura thuneihna a inpe bawk. Hei bakah hian an ram chief justice paihthlakna tur ruahmanin, a mi rin zawng tak chu a thlaktu atan a dah bawk a ni.