US-in tang inthleng tura Venezuela rawtna a hnawl
US chuan Venezuela sorkarin tang inthleng tura rawtna a siam chu a hnawl.
Venezuela President Nicolas Maduro chuan Venezuela eptu hruaitu, kum 2014 kumtir lama sorkar laka lungawi lohna lantir ṭuma tharum thawh tura mipuite fuihpawrtua puh a man, Leopoldo Lopez chu US-a tang mek, Puerto Rican mi Oscar Lopez River chhuah a nih chuan US-ah kaltirin a chhuah zalen ve nghal tur thu a sawi.
Mahse US official-te chuan President Maduro rawtna hi hnawlin, tang pahnihte thubuai chu khaikhin theih a nih loh thu an tarlang.
Kum 72 mi, Lopez Rivera hi kum 1981 khan US aṭanga Puerto Rican independence hmuh theihna atana inphiarrukna kalpuia puh a nih avangin thiam loh chantir a ni. Kum 1999 khan khatih laia US President Bill Clinton-a'n amah leh Armed Forces of National Liberation (FALN) armed group member ṭhenkhatte intiamkamna neihtira ngaihdam a rawtna chu a lo hnawl tawh a ni.
US official-te chuan FALN hi New York, Chicago leh US khawpui danga bomb tihpuahna thleng ṭum 100 chuangah an inhnamhnawih niin an sawi.
Lopez Rivera hi kum 55 tang tura thiam loh chantir a ni a, hei bakah hian tan in aṭanga tlanchhuah a tum vangin a tan hun hi kum 15 pawhseisak a ni bawk.
US state department thupuangtu, Jen Psaki chuan Leopoldo Lopez leh Lopez Rivera-te pahnih chu khaihkhin theih an ni lo tih sawiin, "US chuan vawi tam tak politics vanga tangte chhuah vek turin a lo ngen tawh a, mahse President Maduro chuan Venezuela harsatna tak takte ngaihtuaha sawiho aiin, eptu hruaitute chu ram pawn lama thawnchhuah a rawt zawk a ni," a ti.
Leopoldo Lopez hi eptu pawl, Popular Will party hruaitu niin, nikum February 18 khan sorkar kutah a inpe a ni. Sorkar chuan Lopez hi politics vanga buaina chhuak, mi 40 zetin an thihphahnaa a mawhphurtuah a puh. Mahse Lopez-a thlawptute chuan sorkar laka lungawilohna a lantir vang chauha man a ni tih an sawi thung.