Palestinian-in ICC a zawm tur US-in a thlawp lo

United Nations Secretary-General, Ban Ki-moon chuan Palestinian chu April 1 aṭang hian International Criminal Court (ICC) member a ni dawn tih a lo sawi tawh a, mahse US chuan hei hi chhangin Palestinian Authority chu ICC zawm theia a ngaih loh thu a sawi.

State Department thupuangtu Jen Psaki chuan, "US chuan Palestine chu sovereign state-ah a pawm loh avangin ICC member nih theihna atana Rome Statute hmang theihah a ngai lo a ni," a ti.

ICC member a nih chuan Palestinian hian Israel lakah war crime thubuai a thehlut thei dawn a, court prosecutor-te chuan kum 2014 July leh August thlaa Israel-in Gaza Strip-a beihpui a thlak chungchang pawh an chhui thei dawn a ni. Beihpui thlak vang hian Palestinian 2,100 chuang, Israel sipai 67 leh Israel civil mi paruk an thi a ni.

Palestinian lam chuan Israel-in dan loa Palestinian ram a luahsak, West Bank-a Juda-te chenna tur in a sak chungchang te, Gaza Strip dang bet a sipai chakna hmanga beihpui a thlak dan te chu an buaipui ber tur a ni ang, an ti.