NKorea-in hrekna hlip turin US a ngen

Democratic People's Republic of Korea (DPRK) chuan United States chu awmze nei loa an ram an hrekna zawng zawngte hlip vek turin a ngen a, hei bakah hian South Korea chu Korea ram pahnihte inlaichinna siamṭhat tuma an hmalaknaah a ngaihdan dik tak tichiang turin a ti bawk.

National Defence Commission (NDC) chuan thuchhuah siamin, "US-in North Korea ram a hrek chhante hi huatna policy a kalpui vang mai a ni," tiin, US chu kumtir aṭanga an inkar boruak tichhetuah a puh bawk.

Sony Pictures Entertainment-in NKorea ram hotu, Kim Jong-un chanchin movie a siam, 'The Interview' a tihchhuah tur tihbuai tuma cyber attack hmangah NKorea hi puh a ni a, hei vang hian kar kalta Zirtawpni khan US chuan NKorea-a mi pawimawh tak tak 10 leh pawl pathumte hrekna tur a siambelh a ni. Hrekna an siamsak zingah hian NKorea rama intelligence organization leh ralthuam hralhtu pawh an tel a ni. NKorea chuan cyber attack hmanga puhna hi nasa takin a pha thung.