Sri Lanka President thar atan Sirisena thlan tlin a ni

Nilaini-a Sri Lanka President thar tur thlanna neihah eptu pawl candidate, Maithripala Sirisena chuan President ṭanglai, Mahinda Rajapaksa hneh­in, Sri Lanka president thar a ni dawn ta.

Inthlan result kimchang hi tihchhuah la ni lo mah se, Sirisena hian fal taka hma hruaiin a tling dawn tih hriat­chian a ni tawh a, President Rajapaksa pawhin nimin khan inthlan­a a chak loh a pawm thu a puang tawh a ni. Result kimchang puan a nih hunah Sirisena hi vote 4,00,000 vela a tlin rin a ni.

President chuan eptu pawl hruaitu Ranil Wickremesinghe biain, boruak ṭha tak hnuaiah President thar hian a hna a zawm theih a beisei thu sawiin, lawmpuina a hlan nghal bawk.

Election official-te chuan President thlannaah hian vote nei mi maktaduai 15 vel an awm thu sawiin, vote pawh a tla ṭha thawkhat hle niin an sawi a, hmun tam zawkah vote hi 65-70% a tla niin an sawi.

President thlannaah hian candidate 19 an awm a, mahse heng zingah hian a term thumna atana chuhtu, President ṭanglai, kum 69 mi Rajapaksa leh a cabinet minister hlui, kum 63 mi Sirisena-te chu an inbitum ber a ni.

Rajapaksa hian President hi a term thumna atana a chuh leh theihna turin dan pawh a siam danglam a, a tlin leh ngei beiseiin inthlan pawh hi a hun hma kum hnihah a buatsaih a ni.

Sri Lanka President thar tur, Pallewatte Gamaralalage Maithripala Yapa Sirisena hi Rajpaksa kaihhruai sorkara Health Minister leh rorellai Sri Lanka Freedom Party senior member ṭhin a ni a, nikum November 21 khan president thlannaa eptu pawl candidate ni turin a nihna aṭang hian a bang a ni.

Kum 1989 khan Sirisena hi a ṭum khatna atan Parliament member-ah thlan tlin a ni a, Kumartunga hnuaiah ministry eng emaw zat a lo chelh tawh a ni. Kum 2005 khan Rajapaksa sorkar hnuaiah Agriculture minister atan dah a ni a, kum 2010 khan Health Minister-ah dah a ni leh bawk. President a chuh dawn hian amah thlawptu zingah President hlui Chandrik Bandaranaike Kumaratung leh Prime Minister hlui Ranil Wickramasinghe-te pawh an tel.