Europe-a US military base 15 khar dawn

US sorkar chuan Europe khawmuala military base a neih zinga 15 chu a khar thuai dawn tih Defence Secretary Chuck Hagel chuan a sawi.

Pentagon chuan military base 15 an khar hmang hian kum khatah dollar maktaduai 500 vel an hum theih phah dawn niin a sawi a, Europe lama an hmunpuite kharin Asia lam hawi an tum tawh zawk a ni.

US hian Europe-ah hian sipai 60,000 chuang a dah mek a, heng zinga a tam zawk chu Germany, Italy leh UK-ah an awm a ni. US sipaite hian UK-a RAF Midlenhall, Suffolk ami te, Cambridgeshire-a RAF Alconbury leh RAF Molesworth-te an chhuahsan ang a, hei bakah hian Germany, Belgium, Netherlands leh Italy-a an base-te pawh an khar tur zingah hian a tel. RAF Mildenhall hi kum 1950 aṭang khan America sipaite tana hmun pawimawh tak a ni a, he hmunah hian US Air Force Special Force-te awmin, air-to-air tanker te an dah bawk. Mildenhall-a KC-135 tanker-te chu Germnay-a US base-ah sawn an ni ang.

Europe-a military base siam chungchang hi US sipaite chuan hun eng emaw chen chu an lo ngaihtuah tawh a ni. Khar ṭhen an tum chhan hi sum senso tihtlemna atan tih ni mah se, Pentagon hian Asia-Pacific lama zau zawka inzarpharh a tum vang pakhat a ni.