Thailand PM hlui thubuai ngaihtuah ṭan a ni

Thailand Prime Minister hlui, Yingluck Shinawatra-i chu nikum May thla khan PM a nihna aṭangin paihthlak a ni a, a thuneihna dik lo taka hmanga puh a nih chungchang thubuai chu nimin aṭang khan ngaihtuah ṭan a ni.

Shinawatra-i hi PM a nih laia a thuneihna dik lo taka hmanga puh a ni a, sorkarin sum tam tham tak a hloh phahna rice subsidy scheme kalpuiah puh a ni bawk. He scheme hmang hian Yingluck-i kaihhruai sorkar chuan Shinawatra chhungkaw chakna bul pakhat, Thailand loneitute hnen aṭangin global market rate aia sang deuhin buhfai a lei a, hei vang hian sorkar chuan dollar tluklehdingawn tel a hloh phah a ni. A thubuaiah hian thiam loh chantir a nih chuan kum nga chhung politics khel thei lo tura hrem a ni thei dawn a ni.

Tualchhung politics buaina vanga hun rei tak chhung ramchhung buaina a thlen hnuah nikum May thla khan sipai chakna hmangin PM hi ban a ni a, tun thlengin sipaite hian thuneihna hi an la chelh zui a ni.