Charlie Hebdo office beitute zawn chhunzawm zel an ni

Nilani-a France khawpui, Paris-a Charlie Hedbo magazine office beitu nia rinhlelh mi pahnihte chu zawn chhunzawm zel an ni.

France Police-te chuan heng mi pahnihte hi Paris hmarchhak lam, Picardy bialah an zawng mek a, mi pahnihte hian Ningani khan helai biala petrol station an rawk nia sawi a ni.

Ningani zan khan a zan hnihna tan Paris-ah misual kut tuara thi mi 12-te hriatrengna hun hman a ni leh bawk. Nimin khan Council of Paris chuan meeting neiin, Charlie Hebdo chu honorary citizen-ah an puang.

Office beitute hi Islam firfiakte nia hriat an ni a, Charlie Hebdo magazine-in a tiel zawnga zawlnei Muhammad-a chungchang a chhuah vanga thinurin an bei nia rin a ni. Office an beihnaah hian mi 12 an kaphlum a, hengte hi journalist pariat, police officer pahnih, catetaker leh a tlawhtu pakhat an ni. Mi 11 in hliam an tuar bawk a, an zinga mi pali-te dinhmun chu a ṭha lo hle.

Police-te chuan magazine office beitu nia rinhlelhte hi unau - Cheif leh Said Kouachi, Algeria hnam, Paris-a piang niin an sawi. An thlalak pawh hi an ti­chhuak tawh a ni. Office an beih hnu hian an car ruk, Renault Clio hmangin an tlanchhia nia sawi a ni.

Nimin khan Muslim-te'n France rama mosque hrang hrangah ṭawngṭaina hun an hmanah, tharum thawhna thlen zawng leh firfiaka chetna an dem chu an sawi.