France-ah firfiaka chetna duh lohna lantirin kawng an zawh
Firfiakte'n France khawpui, Paris-a Charlie Hebdo magazine office bei a, mi 12 an kahhlum hnuah kar kalta Inrinni khan France ramchhunga khawpui lian hrang hrangah firfiaka chetna duh lohna lantirin kawng an zawh a, mipui tel an ṭhahnem hle. Nimin khan France khawpui, Paris-ah kawng zawh huaihawt a ni leh bawk.
France Interior Minister Bernard Cazeneuve chuan Inrinni-a Toulouse, Lille, Marseille, Lyon, Grenoble leh Clermont-Ferran khawpuia kawngzawhah hian mi 700,000 vel an tel niin a sawi.
Thil nuihzathlak leh selna hmanga zirtirna nei thuziak leh lemziak tichhuak ṭhin, Charlie Hebdo magazine office hi kar kalta Nilaini khan misual pahnih, Said leh Cherif Kouachi te unau chuan luhkhungin mi 12 an kaphlum a, hemi hnu hian hmun pakhatah mi ṭhenkhat hrengin an tawmpui zui a ni. France Police-te chuan Zirtawpni khan misualte awmna hi hualin an kaphlum a, an mi hrente erawh chu him takin an chhuak a ni. Police-te hian misualte thurualpui ni thei awm an zawng zui mek a ni.
Nimin zing khan Charlie Hebdo magazine-in zawlnei Mohammad-a cartoon a tihchhuah lo chhuah chhawngtu, German newspaper Hamburger Morgenpost building chu beih a ni leh. Office ah hian lung leh mei an vawm lut a, lehkha pawimawh eng emaw zat a chhia a, thi leh hliam erawh an awm lo nia hriat a ni. Police-te chuan rinhlelh thilah mi pahnih an man tawh tih an sawi.
Nimin vek khan Paris khawpuia kawngzawh huaihawt leh niin, Inrinni-a kawngzawh aiin an ṭhathnem zawk hle beisei a ni. He rally-ah hian khawvel ram hrang hruaitu 40 vel an tel rin a ni bawk a, kawngzawh chhunga venhim hna thawk turin police office 2,000 leh sipai 1,350 vel duty tir an ni bawk.