Pope-in Asia ram pahnih a tlawh dawn

Roman Catholic kohhran hotu lu, Pope Francis chuan January 12-19 chhung hian Asia ram pahnih, Sri Lanka leh Philippines-te a tlawh dawn a, hei hi thla ruk chhunga Asia a tlawh vawi hnihna tur a ni.

Pope hian January 18 hian Asia rama Catholic tamna ram, Philippines ah outdoor Mass a buatsaih dawn a, mi maktaduai ruk vel an tel rin a ni. Philippines ram mipui 80% chuang hi Cathlolic an ni. Pope cham chhung hian venhimna lam pawh uluk taka kalpui tum niin, sipai hotu General Gregorio Catapang chuan police leh sipai 40,000 duty tir an tum tih a sawi. Kum 1995-a Pope John Paul-a'n Manila a tlawh ṭuma mass a buatsaihah khan mi maktaduai 50 vel an tel a ni.

Philippines-a a cham chhungin Pope hian kum 2013-a thlipui, Typhoon Haiyan tleh vanga mi 6,300 an thihna, Tacloban a tlawh bawk ang.

Kum 78 mi, Pope Francis hian naktukah Sri Lanka khawpui, Colombo a thleng ang a, ni thum a cham ang. A cham chhung hian Dutch mite'n an awp laia Sri Lanka-a official religion atana Calvinism puan anih hnu, kum zabi 17 leh 18 hunlaia Catholic kohhran tunding leh tura beitu, puithiam Joseph Vaz chu mi thianghlimah a puang ang.

Sri Lanka ram mipui 70% chu Buddist niin, Hindu 13%, Muslim 10% leh Catholic 7% vel an awm a ni.