Hmeichhe naupang thihchilh bomb tihpuahah mi 19 an thi
Nigeria hmarchhak lama Maiduguri khawpuiah kar kalta Inrinni khan hmeichhe naupang, kum 10 miin thihchilh bomb a tipuak a, mi 19 an thi.
Hmeichhe naupang taksaah hian bomb hi ṭawnbeh a ni a, chhun dar 12.40 velah bazar lunlaiah lutin, gate-ah an lo enfiah laiin a bomb pai hi a puak ta a ni.
Khawchhung hotu, Ashiru Mustapha chuan, "Hmeichhe naupang hi kum 10 mi vel chauh a ni a, a taksaa an ṭawnbeh chu enge a ni tih pawh a hriatthiam kher ka ring lo," a ti. Bazar gate-a a luh dawn hian metal detector chuan a thil pai chu lo manin, dahhran a nih hmain bomb hi a puak ta niin a sawi.
Hetihlai hian Nigeria helpawl, Boko Haram chuan an ram hmarchhak lamah Islam state din tumin an la bei zui zel a, kar kalta khan Borno state-a sangha mantute khawpui pawimawh, Baga khua an bei leh. Helho hian Lake Chad bula Baga khua leh a chhehvela awmte chenna in tam tak an halsak a, mi 20,000 vel chu himna zawngin an tlanchhia a ni. He pawikhawihna thlenga thi zat chiah hi hriatchian a la ni lo a, Borno state police thupuangtu Gideon Jubrin chuan mi 19 thiin, mi dang 18 velin hliam an tuar nia an hriat thu leh, thi zat pawh hi an la pun chhoh a rin thu a tarlang.