March thlaah Egypt parliament inthlan buatsaih a ni dawn

Egypt Election Commission chuan an ram inthlanpui thawh hniha neih tur chu March 22-23 hian ṭan a ni dawn tih a sawi.

Kum 2012-a court-in House of Representative a ṭhiah hnu khan Egypt hi parliament main chamber nei loin a la awm a, kum 2013 khan mipuite thlan, Mohammed Morsi chu President aṭanga paihthlak a ni.

House of Representatives ṭhiah a nih hnu hian thuneihna hi Shura Council hnenah hlan a ni a, mahse Morsi paihthlak a nih hnuah Shura Council hi ṭhiah zui a ni leh a ni. Hemi hnu hian President thar, sipai hotu hlui Abdul Fttah al-Sisi kutah legislative power dah vek a ni.

Higher Election Commission chuan inthlan hi thawh hniha neih a ni dawn tih sawiin, a thawh khatna hi March 22-23 ah neih a ni ang a, a thawh hnihna chu April 26-27 ah neih a nih tur thu a sawi.

President hlui Morsi chu paihthlak ni tawh mah se, House of Representative-ah hian amah thlawptu leh an pawl, Muslim Brotherhood thlawptu an la tam zawk a ni. Mahse sipai chakna hmanga paihthlak a nih hnu khan sipai kaihhruai sorkar chuan Muslim Brotherhood lakah hian beihpui thlakin, firfiak pawlah puangin nikum August thla khan court chuan inthlanpui neiha chuh thei lo turin an party hi a lo ṭhiahsak tawh a ni. Morsi-a lamṭangte hian inthlanpui neih turah hian party thar an din a nih loh chuan independent candidate ang chauhin an chuh thei dawn a ni.