Pakistan president hlui thubuai ngaihtuah nawn tura dilna chu SC-in hnawl

Islamabad-a special court-in nikum December 17-a thi tura a chung thu a rel, Pakistan president hlui leh sipai hotu hlui ni bawk Pervez Musharraf-a'n a thubuai ngaihtuah nawn tura a ngenna chu Pakistan Supreme Court (SC) chuan a hnawl sak.

Musharraf-a thubuai neih lai hi ram phatsantna thubuai a ni a, kar kal ta Ningani khan a thubuai hi ngaihtuah ṭha leh turin SC-ah ngenna a thehlut a, a tuk Zirtawpni khan SC chuan a hnawl sak a ni. Musharraf hi Pakistan sipai hotu zinga ram phatsanna chungchanga thubuai nei lian ber leh thi tura tih hmsak ber a ni. 

Ram phatsanna thubuai a neih bakah kum 2007-a prime minister hlui, Benazir Bhutto thahnaa in­hnamhnawiha puh a ni a, anti-terrorism court chuan tualthah thubuai a lo siamsak tawh bawk a ni. Kum 2007 khan president a nih laiin Musharraf hian an ramah emergency a puang a, a thiltih sawiseltu judge eng emaw zat a mantir bakah, superme court judge eng emaw zat pawn chhuak thei loa a hren vang leh, judge 100 chuang zet a ban vangin ram phatsantua puh a ni a,  kum 2014 March thla khan thubuai siamsak a ni.