Khawvel pumah Covid-19 vanga thi nuai riat chuang tawh
Khawvel puma hripui leng mek, Covid-19 thihpui chu mi nuai riat chuang an ni tawh a, he hri kai hmuh chhuah hi mi maktaduai 23 an tling tawh thi Johns Hopkins University-a Center for Systems Science and Engineering chuan a tarlang.
US chu hri kai tamna leh thihpui tamna ber ram a la ni chhunzawm zel a, hri kai hmuh tawh hi mi 56,26,284 awm tawhin an zinga 1,75,429 in an thihpui tawh. Brazil-ah hri kai hmuh chhuah 35,32,330 an awm tawh a, mi 1,13,358 in an thihpui tawh bawk.
US-ah hri kai punna in ziaawm lam pan
US-ah chuan ni sarih chhung chu ni khata hri kai hmuh chhuah thar hi 50,000 hnuai lam zel an ni tawh. Hei hi July thla hnua nitina hri kai thar an tlakhniam ber hun a ni.
CDC Director Robert Redfield chuan, "Kar li kalta aṭang khan hmasawnna kan hmu chho a, kan hmuh chhunzawm zel pawh ka beisei," a ti. Test neih zat chu pung zel mah se, hri kai hmuh thar punna erawh a tlahniam ṭan tawh a ni.
Hetih lai hian mithiamte chuan ram pum huapa hri kai punna hi tlahniam ṭan mah se, Midwestern state lamah erawh chuan an la pung chak hle nin an sawi thung.
SKorea-ah hri kai pung thar leh
South Korea-ah ni 10 chhung chu hri kai hmuh chhuah thar hi digit thum zel an tlin leh tak avangin sorkar chuan hri darh tur venna atan khuahkhirhna khauh zawk a siam leh dawn nia sawi a ni.
Centers for Disease Control and Prevention chuan nimin khan hri kai thar 397 hmuh an ni leh tih sawiin, hri kai pun chak dan chu an rama coronavirus a len ṭantirha an pun dan nen a inang chho thuak leh tawh tih an sawi. Hri kai hi Seoul metropolitan region chauh ni lo, ram chhunga khawpui lian leh province 17 dangah an pung tih sawiin, ram pumah a darh leh mai hlauthawnna a lian hle tih KCDC Director Jeong Eun-kyeong chuan a sawi.