Israel beihna vangin Gaza chhim lamah mi 25 an thi

Gaza khawpui chhim lama sikul, chhawmdawlna-in atana hman ni ta chu Thawhlehni khan Israel chuan van lam aṭangin an bei a, Palestinian 25 an thi.

Chhawmdawlna-in an kah fuh avanga thi zat hi Nasser Hospital, Khan Younis-a ruang an dah luh zat aṭanga chhutin mi 25 an ni tih Associated Press chuan a tarlang. Nasser damdawi-in thupuangtu, Weam Fares chuan thi zingah hian hmeichhia leh naupang pasarih an tel tih sawiin thi zat hi an la pun belh a ring tih a sawi bawk. Hemi hma hian Israel beihna vang bawkin central Gaza-ah mi 14 an thi bawk a ni.

Israel hian Gaza-a beihpui an thlak hi ngawrh lehzualin an kalpui a, Gaza hmar lama inenkawlna hmunte an beih vangin mi tam tak inhumhimna zawngin an lo tlanchhe tawh bawk. Gaza indona a chhuah hnu hian mi tam tak raltlan mah se khawpui hmar lamah hian raltlan ve lo, Palestinian tam tak an la awm a ni. Israel hian beihpui an thlak hi an bei ngawrh thar hle niin a hmuna awmte chuan an sawi a, Israel indo thawlhtheihna leh drone te chuan thil che hlek chu an kap vek tiin, Israel tank-te pawh central district-ah an lut tawh niin an sawi.

Tun hnaia Israel in inbeihna ngawrh lehzuala a kalpui avang hian inkahhai puang tura inbiakna neih mek chu a tibahlah thei tih Hamas chuan an sawi.

Hamas firfiak 60% thah leh hliam an ni tawh : Israel Defence Minister

Israel defence minister Yoav Gallant chuan Knesset-ah, Israel Defence Force (IDF)-te chuan Gaza Strip-a beihpui an thlaknaah hlawhtlinna tam tak an nei tawh a, Hamas firfiak zinga 60% chu thah leh kah hliam an ni tawh tih nimin khan a sawi.

Minister Gallant chuan, "Hamas battalion 25 kan ti chhe tawh a, an mi man zinga a zahve hruai haw ni tawhin, a la tangte pawh hruai haw kan tum a ni," a ti. IDF te beihpui thlakna avangin firfiak 14,000 chuang nuaibo an ni tawh, tiin hemi rual hian beihpui thlakna chu danin a huam chin anga kalpui zel a ni dawn tih a sawi bawk.