US leh a thawpuiten Ukraine tan air defence system pek belh dawn

United States leh a thawpui ramte chuan thuchhuah inṭawm siamin, Ukraine tan air defence system panga an pe dawn tih NATO summit neih mekah an puang. Hemi bakah hian Ukraine chu engtikah emaw tactical air defence system pek an tum tih an tarlang bawk.

US president Joe Biden chuan NATO summit-ah hemi chungchang hi sawi langin a hnuah U.S, Netherlands, Romania, Italy, Germany leh Ukraine te chuan thuchhuah inṭawm siamin an rawn sawi chiang ta a ni. Ukraine hian a thawhpui ramte chu air defence pek belh tur hian a lo ngen fo tawh a, Thawhṭannia Russia in missile hmanga a kah avanga mi 40 chuangin nunna chan an hnuah khan president Volodymyr Zelenskyy chuan air defence system ṭha zawk an mamawh thu a sawi leh a ni.

US Congress-in Ukraine puihna tur sum a pawmpui theih mai loh avangin Ukraine hian an mamawh phuhruk zo, ralthuam leina tur sum an nei lo tih Zelensky chuan lo sawi tawh a, hei vang hian Russia chan a ṭha tih a sawi tel bawk. Tun hnaiah Russia hian Ukraine khaw ṭhenkhat an lak belh bakah missile leh drone hmanga ngawrh lehzuala a beih avangin Ukraine hian air defence bakah ralthuam dang leina tur sum an mamawhna a sang hle a ni. Hemi avang hian US in April thlaa USD tld 61 ṭanpuina sum a pawmsak leh tuna NATO ramten air defence system an pek belh tur hi an ṭangkaipui hlein a rinawm.