Naupangin hmai tuamna an vuah tur a ni : WHO leh UNICEF
World Health Organization (WHO) leh United Nations Children`s Fund (UNICEF) ṭangkawp chuan naupang kum 12 chin chunglam chuan hri leng avangin puitling angin hmai tuamna an vuah tur a ni tiin thuchhuah an siam.
Hei bakah hian an awmna hmun hlauhthawnawm dan azirin naupang kum ruk aṭanga kum 11 pawhin an vuah tur a ni an ti bawk. Pawl pahnihte chuan naupang kum 12 leh a chunglamte hian midang nena metre khata inhlata awm a remchan lohnaah phei chuan mask hi an vuah ngei a ngaih thu an sawi. Hei hi an awmna hmun a him tawk em tih hriatchian a nih loh vang a ni.
Naupang kum 5 leh a hnuai lam chin erawh vuah ngei ngei tura tih an ni lo thung. Hei hi an nu leh pate bula an la awm tam avang leh, pawn chhuak lo an nih tlangpui vang a ni. Hetianga pawl pahnihin thuchhuah a siam chhan hi tun hnaiah naupang lamah Covid-19 hri a darh chhoh nual vang a ni.
WHO leh UNICEF chuan a tirah kum lama upa zawkah Covid-19 hri a darh chak thu tarlangin, tunah chuan he hri hi kum naupang lamah pawh a darh chho mek avangin fimkhurna hrang hrang hman a ngaih thu an tarlang.