Java Sea aṭangin AirAsia flight data recorder lakchhuah a ni

December 29-a che­sual, AirAsia thlawhtheihna, flight QZ8501 chu ngawrh taka zawn chhunzawm zel niin, a tlak aṭanga ni 16 hnu, nimin khan Indonesian Navy-te chuan thlawhtheihna black box pahnih zinga pakhat chu Java Sea aṭangin an lachhuak a, a dang pakhat erawh chu tuihnuaiah a la tang a ni.

Flight data recorder an hmuh aṭang hian thlawhtheihna chanchin kimchang hi hriat theih beisei a ni.

Pathianni khan black box an hmuhna bulah hian signal an hmu a, nimin zing khan an la chhuak thei ta niin Indonesia search and security agency hotu, Henry Bambang Soelistyo chuan a sawi. Mahse cockpit voice recorder erawh an la lachhuak thei lo.

Bambang Soelistyo chuan, "National Transport Safety Committee hotu chuan zing dar 7.11 khan black box, flight data recorder tia kan sawi hi hlawhtling taka an lakchhuah theih thu min rawn hrilh a ni," a ti.

Black box hi tuifinriat chhung, meter 30-32 a thukah hmuh a ni a, thlawhtheihna them dang zingah a lo tang a, pakhat hi lak­chhuah tuma beih mek a ni.

AirAsia thlawhtheihna tlaah hian mi 162 chuang an thi vek a, an zinga mi 48 ruang chu hmuh an ni tawh a ni. Thlawhtheihnaa chuang zinga a tam ber hi Indonesia mi an ni.

Black box an lakchhuahte hi Indonesia khawpui, Jakarta-ah enfiah tura lak a ni ang a, data awmte hre kim tur chuan thla khat zet hun a ngaih rin a ni.

National Transportation Safety Committee-a main investigator, Madjono Siswosuwarno chuan, "Data download chu thil harsa a ni lo a, ni khatah pawh zawh theih a ni ang. Mahse a chhiar kha a harsa dawn a, kar hnih aṭanga thla khat vel hun a ngai dawn a ni," a ti.