Hamas-te'n Palestine-a inthlan buatsaih turin an nawr

Palestinian pawl, Hamas leh Gaza Strip-a pawl dangte chuan Palestinian unity government chu inthlan buatsaih turin an nawr.

Hamas ngenna angin Pathianni khan Islamist pawl leh left-wing group hruaitute hi Gaza-ah an inhmukhawm a, Gaza hlamchhiah a nih dante an sawiho. Meeting-ah hian Palestinian President Mahmoud Abbas-a party, Fatah party hruaitute erawh an tel ve lo.

Meeting zawhah hian thuchhuah siamin, national committee din an phut thu te, hemi hnuah Hamas leh Fatah pawlte'n inremna an lo siam tawhte a taka kalpui an phutna thute an chhuah a ni.

Pawl hrang hrang hruaitu kalkhawmte chuan Palestinian-a unity sorkar chu a mawhphurhnate ngaihsak tur te, Palestine-a inthlanna tur buatsaih tur te leh Gaza Strip ngaihsak turtein an phut a, Gaza Strip dinhmun chu a la chhe hle niin an sawi. Unity sorkarin Gaza Strip a ngaihsak loh chuan hma lak dan tur kawng dang an dap mai dawn niin an sawi bawk.

Palestinian pawl hnih, Fatah leh Hamas-te'n inremna an siam angin nikum June thla khan ṭangrual sorkar, unity sorkar hi an din a ni.

Hetihlai hian sorkar official-te chuan Hamas-te chu Gaza Strip thunun bet tlatah puhin, sorkarin hma a lakna pawh an dal niin an puh thung.