France President-in security meeting a ko

Kar kalta Nilaini-a misualte'n France khawpui, Paris-a Charlie Hebdo magazine office beia mi 12 an kahhlum hnuah, France President Francois Hollande chuan an ram himna chungchang ngaihtuah turin cabinet minister-te chu crisis meeting a neihpui.

Charlie Hebdo office beih a nih hnu, kar kalta Zirtawpni khan Islamist firfiak pakhat chuan Kosher supermarket beiin Juda mi pali leh hmeichhe police pakhat a kaphlum leh bawk a ni. Magazine office beitu leh supermarket beitu misualte hi Zirtawpni vek khan France police-te'n an kaphlum nghal.

Inrinni khan France ram khawpui hrang hranga firfiaka chetna duh lohna lantirin kawng zawh a ni a, Pathianni khan Paris-ah unity rally huaihawt leh niin, he hunah hian mi maktaduai 1.5 vel an tel a, ram hrang hrang hruaitu 40 velin rally hi an telpui bawk.

Pathianni-a unity rally neihah hian UK Prime Minister David Cameron, German Chancellor Angela Merkel, Israel Prime Minister Benjamin Netanyahu leh Palestinian President Mahmoud Abbas-te pawh an tel.