Iraq sipaiten Fallujah khua la let tawh

Iraq Prime Minister Haider al-Abadi chuan Islamic State (IS) firfiakte kut aṭangin Fallujah khawpui chu an la let tawh niin a sawi.

Iraq sipaite chuan Fallujah khua lak let tum hian hun rei tak chhung IS firfiak lakah beihpui an thlak tawh a ni. PM al-Abadi chuan sipaite hian khawpui chhung≠ah thuneihna an chang tawh a, firfiakte bihrukna hmunte pawh reiloteah an luh chhuak ve dawn tih a sawi.

IS ho kuta la awm, Mosul khawpui pawh lak let tumin an bei leh n ghal dawn tih PM chuan a sawi a, firfiakte chu an hneh ngei dawn a ni, a ti.

Iraq sipai hotu, Lieutenat Ge≠neral Abdulwahab al-Saadi chuan Fallujah khawpui chhunga sorkar hmun pawimawhah Iraq hnam puanzar zar a ni leh tawh tih a sawi.

Firfiak leh sipaite inbeihna avangin khawpui chhung aṭangin mi tam tak an tlanchhiat belh leh, international aid group chuan Zirtawpni khan chhungkaw 2,300 vel an tlanchhhiat belh niin a sawi.

Fallujah khaw pawnah hian chhawmdawl hna thawktute an awm a, an ni hian tualchhung indona thleng avanga hlaua tlanchhia, civil mite an lo buaipui a ni. UN refugee agency (UNHCR) chuan kar kalta khan ni hnih chhung lekin mi 20,000 chuang zet an tlanchhia niin a sawi a, civil mi tlanchhiate hi an pung zel a, anmahni lo enkawl kawngah pawh harsatna a awm
ṭan niin a sawi. A bikin tui thianghlim sem turah harsatna a tawk a, ni khatah mi pakhat tan litre thum ang chauh an pe thei tawh niin Norwegian Refugee Council-a Iraq director Nasr Muflahi chuan a sawi.

UN leh Iraq sorkar chuan Fallujah khua aṭanga tlanchhiate awmna tur hi mi 60,000 awm theihna tur camp an siam a, mahse camp hi an tawt tawh hle. UNHCR chuan Fallujah aṭang hian indona a thlen hnuah mi 70,000 an tlanchhuak tawh a, kar leh chhoah hian mi 60,000 vel an tlanchhuah belh leh an rin thu a sawi. Hetihlai hian khaw chhungah chhungkaw tam tak chu an tangkhang mek a ni.