Japan-ah US sipai duh lohin kawng zawh

Japan rama Okinawa thliarkara US sipai tam tham tak dah an nih duh lohna lantirin nimin khan tualchhung mipui≠ten kawng an zawh.

Okinawa-ah hian US sipai hmunpui, US Futenma airbase a awm a, he thliarkarah hian sipai 26,000 vel an awm a ni. US sipai hi US-Japan security thawhdunna tura inremna an siam hnuaiah dah an ni a, ram zau tak luahin, Okinawa thliarkar hmun ngaa ṭhena hmun khat chu America sipaite hian an luah a ni.

Futenma airbase hi mipui bitna hmunah a awm a, thliarkar chengte hian he hmun hi mipuite chenna bial hlata sawnchhuak turin an lo phut tawh bawk. Indopui II-na zawh hnu aṭang khan Okinawa thiarkarah hian US sipate hi dah ṭan a lo ni tawh a ni.

Kum 1995 khan America sipai pathumte chuan naupang kum 12 an pawngsual rawn avangin lungawi lohna lantirin kawngzawh huaihawt a ni a, he kawngzawhnaah hian mi 85,000 an tel a ni. Mipuiten lungawi lohna an lantir hnu hian US leh Japan sorkar chuan Futenma airbase chu thliarkar hmarlama mipui tlemna bial, Henoko-a sawnchhuah a nih tur thu an lo puang tawh a, base tur pawh hi sak mek a ni bawk.

Hetihlai hian Henoko biala chengte chuan an bial chhung US sipai hmunpui dah tur hi duh loin, vawi tam tak nawrh an lo huaihawt tawh. Base awmna tur hmuna motor lut leh chhuak turte pawh an lo dang tawh ṭhin a ni.