Barcelona chanchin a ngaihnawm zel Chhuak tura min duh chuan min hrilh rawh se - Suarez

Barcelona-in Ronald Koeman chu kum hnih chhung atan an coach ni turin an lalut a, Dutch coach hmabak chu team boruak chhe tak Barcelona dinhmun a rang lama chinfel a ni. 

Hetiang boruak karah hian Barcelona president Josep Maria Bartomeu chuan thawm a lo nei ve reng bawk a, senior player tam tak tana hriat nuam lo tur thu sawiin player khawih thiang lo chungchang thlengin a sawi lang.  

Player langsar zingah Luis Suarez chu Bartomeu hian khawih thiang loa a sawi zingah a telh lo a, mahni induh tawk ve tak Uruguayan striker ngaihdan a ni lo. Suarez chuan, "Barcelona tana khel tura min duh loh thu hi tumahin min la hrilh lo. He hmun hi chhuahsan tura min duh a nih chuan hmaichhanah min hrilh rawh se," a ti!

Barca-in insingsak an tum thu ualau takin an sawi a, club president Bartomeu-a'n Marc-Andre Ter Stegen, Nelson Semedo, Lionel Messi, Frenkie de Jong, Clement Lenglet, Ousmane Dembele leh Antoine Griezmann-te chu khawih thiang lo an nih thu a sawi zui nghal zat. 

Bartomeu-a hming chhawpchhuah zingah player vantlang tia sawi theih Semedo hming a lang nawlh hi a mak a, Dembele hi theihna nei sang tak ni mah se a inhliam ngun dan ngaihtuahin hralh loh tur zinga a tel hi a mak viau. Heng zawng zawng aia mak chu Barca chanchina goal khung hnem pathumna ni thei Suarez-a hming a lang tel lo hi a ni a, ani hian nakkum nipui thleng contract a nei a, kum khat dang pawhsei theih a ni bawk.

Suarez-a contract-a 'kum khat dang pawhsei' tih hi season thara 60% match a khelh tlin chuan tiin a inziak niin an sawi - chumi awmzia chu Barca hian player hlawh hnem Suarez hi contract thar pek an duh lo a, a hlawh hnem bawk si avangin 60% aia tlem match khelh tir an duh bawk si lo niin a lang. A chinfelna awlsam ber chu tuna manto zawka hralh a ni. 

Suarez chuan, "President-in player hming meuh a sawi chhuak niin an sawi a, mahse tumahin he club chhuahsan tur hian min la hrilh lo a ni," a ti a, thuthang bak engmah a la hriat loh thu a sawi. 

Barcelona tan tun season-a Messi dawta goal khung hnem ber chu Suarez a ni a, Liverpool striker hlui hian inelna hrang hrangah match 36 khelin goal 21 a khung a, assist vawi 12 a nei - goal 33-ah a la inrawlh cheu tihna a ni. Catalan club tana Suarez-a hnathawh thlirin huaisen taka ṭawng chhuak ngam tur a ni tih a chiang a, ama beisei ang ngeia hmaichhan ngeia hrilh a phu.

Suarez chuan, "Club hian ka tel loa khelh an duh a nih chuan hmaichhanah min hrilh tur a ni. Barca-ah kum ruk hun ka hmang tawh a, an duh zawng chu ka hmai hma ngeia sawi ngam tur an niin ka hria. Tunah chuan engmah a la chiang lo a, hmaichhan ngeiah min hrilh a ngai a ni," a ti. Suarez hian Nou Camp-a season ruk hun a hman chhungin Barca tana goal 198-a khung a, assist vawi 109-a nei bawk. Barca tan match 283-ah goal 307-ah a inrawlh tihna a ni a, sawi nep theih a ni lo. 

Club tana ṭha ber 

Bartomeu-a'n Barca player khawih thiang lo a sawi zinga tel lo langsar zingah Gerard Pique (June 2022 thleng contract nei), Sergio Busquets (June 2023), Jordi Alba (June 2024), Samuel Umtiti (June 2023), Ivan Rakitic (June 2021) leh Arturo Vidal (June 2021)-te pawh an tel.

Pique  bik hian club tana ṭha tur a nih chuan chhuah mai a hnial loh thu Bayern Munich an hneh loh ṭumin chiang takin a sawi tawh a, Spanish media lama titi thar berah chuan Koeman-a'n Pique hi chelh a duh laiin Suarez erawh Alba leh Busquets nen chhuak turin a duh. Suarez hi a club hlui Ajax chuan euro maktaduai 15-a lak an inhuam nia sawi thawm a awm a, thuthang leng vel mai erawh a la ni rih. Suarez chuan, "Club tana ṭha tur ber ka duh a, vawiina ka ruahmanna chu he hmuna cham zel a ni. Mahse, club hian min mamawh lo nia an inhriat chuan thutlukna siamtu te nena inbiak ka duh a ni. 

"Club-in min duh chhung chu cham ka duh a, he hmun ka pantirh aṭang khan fan-te thlawpna hlir ka dawng - chu chuan chakna pawh min pe. He club tan hian hna tam tak ka la thawk theiah ka ngai a, bench aṭanga bul ṭan tura min duh a nih pawhin ka ti mai ang," a ti - Nou Camp chhuahsan a hreh hle. 

Spanish chanchinbu lar Marca chuan Barcelona hian Suarez thlaktu tur an melh ṭan der tawh niin an sawi a, Inter Milan striker Lautaro Martinez chu an dawr thar leh tawh niin an tarlang. Barca president Bartomeu pawhin Martinez an dawr ngei thu hi a lo sawi tawh a, mahse Covid-19 vanga sum lama buaina an tawh avangin an chhunzawm lo tih a sawi tel - mahse, Marca-in an indawr thar thu an ziak tlat. 

Martinez hi a contract ang chuan euro maktaduai 111-a leichhuah theih a ni a, he 'clause' bik hi July khan a tawp tawh. Catalan club hian a man tlawm zawkin an dawr thei tihna a ni a, Inter hian an duh zat zat an chhiar thei tihna a ni tel nghal bawk - Barca hian Martinez manah Arturo Vidal leh Junior Firpo pek tel an inhuam a, Vidal erawh Inter hian an duh lo!

Barca hian Koeman-a'n Netherlands lama a lo enkawl tawh Memphis Depay chu an duh nia sawi a awm bawk a, Martinez hi an lalut thei lo a nih chuan euro maktaduai 50 man bawr vel tur Depay lam hi rang takin an hawi ang. 

Barcelona-in an team boruak chhia siamṭha tura an mamawh ber chu an thiampuipa Lionel Messi 'hlim' a ni a, mahse Argentine forward hian nitinin lawm lohna tur a hmuh belh emaw tih mai tur a ni. 

Kar hmasa Zirtawpni khan Messi hian coach thar Koeman a hmu a, Barca thuneitute laka lawm lo Messi hian Dutch coach hnenah hian chhuah a duh thu a hrilh - a ruka inhmu an ni a, a darh nghal!

Messi leh Koeman inhmuh thu puangtu hi Spanish radio station lar RAC1 an ni a, anni hi ualau taka Barca president Josep Maria Bartomeu thlawptu an ni - hei vang tak hian Messi a thinrim niin an sawi. 

Argentine forward hian an thusawi a darh hrim hrim hi a hua a ni hran lo a, Bartomeu-a thlawptu radio station ber kherin an lo hre hmasa hi a lawm lo - Barca President tan buaina tur a awm belh a, September 12-ah La Liga an ṭan dawn avangin a rang lama buaina chinfel a ngai ang.