Iraq-a New Zealand sipaite awm hun pawtsei

New Zealand chuan an sipaite'n Iraqi Security Force-te training an pek mek chu November 2018 thleng an chhunzawm dawn a, Iraq-ah an sipai hmunpui dang pakhat an din belh dawn bawk. He thu hi New Zealand prime minister John Key chuan nimin khan a sawi.

Prime minister John Key sawi danin, New Zealand sipaite New Zealand-Australia joint mission kaltlanga an sipaite Iraq rama awm mek hun chu kum 2017 tir lamah a tawp dawn a, mahse, New Zealand sorkar chuan a awm hun chu November 2018 thlenga pawhsei a remti a ni.

Tunah hian Iraq ramah New Zeland sipai 105 an awm mek a, Iraq sipaite training an pe ṭhin. New Zeland sipaite hi Iraq ramah hian Taji Military Base-ah an awm mek a, chu bakah chuan, Besmaya-ah military base siam belh an remti bawk.

New Zealand Defence minister Gerry Brownlee chuan, an ram sorkar chuan Iraqi Federal Police-te tihchak nan tha leh hmarua thawh an remti bawk tih a sawi.

Tun thlengin Iraqi Security Force 7,000 chu New Zeland sipaite'n Taji-ah training an pe tawh a, an zinga 975 chu officer an ni. New Zealand-Australia joint mission hnuaiah hian Iraq sipaite training pe turin Australian Defence Force mi 300 vel an awm mek bawk.