Charlie Hebdo-in Mohammad-a lem a tichhuak leh dawn
France rama Charlie Hebdo chanchinbu chu Muslim zawlnei Mohammad-a cartoon a tihchhuah avanga beih tawkin mi 12 an thihphah a, ram hrang hrangin he pawikhawihna thleng hi an dem thu sawiin France rama firfiaka chetna duh lohna lantirna kawngzawhah pawh tel an ṭhahnem hle.
Charlie Hebdo chuan Prophet Muhammad-a lem an tihchhuah avanga beih tawk ni mah se, Nilaini-a edition thar tihchhuah turah Mohammad-a cartoon hi chanchinbu kawmah an chuantir leh dawn. Mohammad-a lem hian Charlie Hebdo office beih a nih an demna leh, Charlie Hebdo chanchinbu an thlawpna lantirna atana an auhla, 'Je suis Charlie' (I am Charlie) tih thuziak chu 'Engkim ngaihdam a ni' tih thuziak hnuaiah a keng dawn a ni. Prophet Mohammad hi a lemah hian a mittui pawh a tla nia sawi a ni bawk.
Magazine edition thar ber hi copy maktaduai thum siam a ni dawn a, khawvel ram hrang hranga mite'n an chhiar theihna turin ṭawng chi 16-a tihchhuah a ni ang. Ṭum dangah chuan kar khatah copy 60,000 an tichhuak ṭhin. Magazine office beihnaah hian an editor Stephane Charbonnier bakah an cartoonist ṭha ber an thi tel. Staff damkhawchhuakte hian kar kalta Zirtawpni aṭang khan French newspaper, Liberation office-ah midangte bungrua hawhin hna an thawk ṭan leh nghal.