US-in Paris March-a top official a tir lo

Firfiakte'n Paris-a Charlie Hebdo magazine office bei a, thawktu mi 12 an kahhlum avanga firfiaka chetna demna lantira unity march buatsaihah khawvel ram hrang hrang aṭangin hruaitu pawimawh tak takte an tel a, mahse US chuan he kawngzawhnaa tel tur hian high-ranking official a tir lo a, hei vang hian sawisel a hlawh zui hle.

White House thupuangtu, Josh Earnest chuan nimina chanchin thar lakhawmtute a kawmnaah, US aiawh tura France-a US ambassador Jane D.Hartley ni lo, dinhmun sang zawk an tirh loh avanga dem an ni chu a hriatthiam thu leh an tihsuala an pawm thu a sawi. Hemi rual hian midang tirh an nih loh chhan erawh a sawilang lo a, thutlukna chu President Barack Obama siam a ni lo tih a sawi thung.

Democrats member ṭhenkhat pawhin France-a top official tirh a ni lo chu mak an tih thu an sawi a, Paris-a thil thleng chu khawvel nghawng tham thil a ni a, France ram chu hun rei tak chhung an ram ṭhianṭha tak a ni bawk a, heti chunga President emaw vice president emaw tal an kal lo chu mak an tih thu an tarlang.

France President Francois Hollande erawh chuan US top official tirh ni lo mah se a lunghnur loh thu a sawi a, "President Obama chuan firfiaka chetna duh lohna lantirna kawngzawhah France chu a thlawp tlat an ni," tiin a sawi.