Cameroon sipaite'n Kolofata-ah Boko Haram hel 143 an kaphlum

Cameroon sipaite chuan an ram hmarlam, Kolofata khuaa military base beitu Boko Haram hel 143 an kaphlum tih an sawi.

Sipai leh helho inbeihnaah hian sipai pakhat a thi tel tih Communications Minister leh sorkar thupuangtu, Issa Tchiroma Bakary chuan a sawi. Bakary chuan helho hian Thawhṭanni zing khan chhum zing hnuaiah Nigeria aṭangin Cameroon an lut a, Kolofata-a sipai hmun pawimawh chu lak tumin an bei tih a sawi.

Helho leh sipaite hi darkar nga chuang zet an inbeih hnuah helho zinga a la damte chu ramri lam panin an tlanchhe zui leh ta a ni. Sipaite hian helho hnen aṭang hian silai eng emaw zat an man sak.

Inbeihna thleng vang hian khawchhunga cheng mi tam tak chu an tlanchhe bawk.

Kolofata an beih hma, kar kalta khan Boko Haram hotu Abubakar Shekau chuan YouTube-a video a dahah nikum December thlaa Nigeria-a Boko Haram hel laka beihpui thlak tura Cameroon-in a sipaite a tirh avangin a beilet dawn tih a lo sawilang tawh a ni.

Boko Haram helte hian Nigeria hmarchhak biala Islam state din tumin hun rei tak an bei a, kum 2009 aṭang an pawikhawihna thlen avangin mi 13,000 chuang an thih tawh bakah, mi maktaduai 1.5 vel chu himna zawngin an tlanchhe tawh bawk. Helho hian hmarchhak biala khaw eng emaw zat an la tawh a, Niger, Chad leh Cameroon nena an inri-na bula state pawimawh tak, Borno state pawh an thununna hnuaiah an dah mek a ni.